Управниот одбор на МАСИТ реализираше продуктивна средба со Министерот за дигитална трансформација, г. Стефан Андоновски. Средбата беше одлична можност за продлабочување на соработката помеѓу министерството и комората, како и за усогласување на приоритетите и визиите за натамошен развој на ИКТ-секторот во земјава. Министерот Андоновски упати искрени честитки до новоизбраните членови на Управниот одбор и Претседателот на МАСИТ, нагласувајќи ја важноста на континуитетот и досегашната работа на комората како релевантен и активен партнер на институциите. „МАСИТ е одличен пријател на Министерството за дигитална трансформација и така ќе продолжиме и во иднина“, истакна министерот, додавајќи дека заедничките активности ќе продолжат со засилен интензитет во областите како што се дигитализацијата, економските потенцијали на технологијата, модернизацијата на јавните и приватни процеси, развојот и примена на вештачката интелигенција и зајакнувањето на капацитетите за сајбер безбедност. Од страна на МАСИТ беа истакнати главните приоритети на новото раководство – создавање предуслови за одржлив раст на ИКТ-индустријата, подобрување на бизнис климата, поттикнување на извозот и интернационализација на домашните ИКТ-компании, како и системска поддршка за дигитални вештини и човечки капитал. Двете страни ја потенцираа важноста од блиска и транспарентна комуникација, навремена размена на информации и иницирање на конкретни мерки и политики што ќе дадат реални резултати за бизнисите, институциите и граѓаните.