Едночасовен бесплатен вебинар – 19.04.2022, 11:00ч МАСИТ, организира бесплатен вебинар на тема: „Генерален преглед на програмите за финансирање од ЕУ, достапни за ИКТ компании од Северна Македонија“ во времетраење од 1 час, а ќе се одржи на 19.04.2022 (вторник) со почеток во 11:00. Консултант кој ќе го води овој вебинар е Симона Трповска од I-DS Coaching & Consulting. Настанот ќе се одржи преку платформата ZOOM. Воедно, најавуваме дека после одржувањето на овој бесплатен вебинар, МАСИТ во текот на мај планира да одржи посеопфатни тематски вебинари кои би траеле еден или два дена, со прецизна презентација на конкретни ЕУ програми и повици кои се апликативни за ИКТ компании. Темите за овие обуки ќе бидат дефинирани согласно фидбекот од компаниите, за кои програми ќе има најголем интерес да се добијат детални информации. За учество на едночасовниот бесплатен вебинар, потребно е да се регистрирате на следниот линк најдоцна до петок, 15.04.2022. *Линкот за вклучување ќе го добијат сите регистрирани еден ден пред одржувањето на вебинарот.

WITSA Global ICT Excellence Awards 2022 Во рамки на WORLD INNOVATION, TECHNOLOGY AND SERVICES ALLIANCE – WITSA каде што МАСИТ членува, и оваа година се организираат WITSA Global ICT Excellence Awards 2022. Оваа манифестација ќе се одржува од 13-15 септември 2022 во рамки на настанот „World Congress on IT“ во Пенанг, Малезија (https://wcit2022.com/). Во рамките на своите активности, за изборот на WITSA Global ICT Excellence Awards 2022, МАСИТ повторно организира избор на „МАСИТ награди за иновативни ИКТ решенија“ за исклучителни достигнувања во доменот на информатичката технологија за 2021 година. Ве повикуваме за номинации за „МАСИТ наградите за иновативни ИКТ решенија“  кои ќе ги опфатат следните категории:  Право на учество имаат сите ИКТ компании кои ќе номинираат сопствени решенија имплементирани кај крајни корисници во нашата земја.Учеството на „МАСИТ награди за иновативни ИКТ решенија 2022“ за членките на МАСИТ е бесплатно, додека за нечленки компании изнесува 50 евра + ДДВ. Претходно номинираните решенија е дозволено да се пријават повторно, под услов информациите за самото решение да бидат соодветно ажурирани. Вашето решение ќе го номинирате со доставување на доленаведените документи на: sofija.zatarakovska@masit.org.mk  најдоцна до 15.05.2022 година. Крајниот рок за номинација на решенијата од страна на МАСИТ до WITSA e 15.06.2022 година. МАСИТ има право да номинира до три номинирани решенија во секоја од категориите кои се објавени погоре. Потребни документи за аплицирање: Пополнета пријава за МАСИТ ИКТ наградите Пополнета Номинациска форма Power Point презентација за своето решение Ги повикуваме и ги охрабруваме сите компании да се пријават на повикот, преку кој ќе имате можност, покрај за вас како компанија, да им дадете признание и на вашите клиенти што го користат вашето решение. За сите останати детали околу самото презентирање, оценување и рангирање на добиените номинирани решенија, ќе бидете дополнително информирани во периодот што следи. Повеќе информации за WITSA Global ICT Excellence Awards 2022 прочитајте на следниот линк.

Избрано е ново раководство со мандат 2022 – 2025 година Стопанската комора за информатички и комуникациски технологии МАСИТ Скопје, на 18.03.2022, во хотел Александар Палас го одржа своето 16-то Редовно Годишно Изборно Собрание, на кое беше избрано новото раководство на комората со мандат март 2022 – март 2025 година. За Претседател на Управниот одбор е избран г-дин Илија Господинов од компанијата Ендава, a Заменик Претседател на Управниот одбор е г-ѓа Весна Иваноска од компанијата Сеавус едукативен и развоен центар. На редовното Изборно Собрание беше избран и нов Претседател на Собранието на МАСИТ, Г-ѓа Анета Антова Пешева од компанијата Унет, а воедно беа избрани и нови членови на Управниот Одбор, Надзорниот Одбор и Судот на честа. Истите се наведени во продолжение:   Членови на Управен одбор на МАСИТ се: Илија Господинов, Ендава, Претседател на Управен одбор Весна Иваноска, Сеавус едукативен и развоен центар, Заменик Претседател на Управен одбор Благој Христов, Македонски Телеком Горан Петревски, Ассеко СЕЕ Дамјан Манчевски, Мак Систем Софтвер Драган Чепујноски, А1 Македонија Ненад Чубриновски, Инплеер Роберт Павлов, Мусала софт Софче Јовановска, Скеил Фокус Членови на Надзорен одбор на МАСИТ се: Миле Стоиловски, Брансис, Претседател на Надзорен одбор Горан Митев, Едусофт, Илија Мишов, ИТ Лабс Членови на Суд на честа на МАСИТ се: Теди Цоневски, Неотел, Претседател на Суд на честа Викторија Дранговска, Коде ИТ Солушнс Дашмир Истрефи, Хојо Тек Новото раководство на МАСИТ во претстојниот мандат ќе има неколку стратешки приоритети за зајакнување на позицијата на комората и заштита на интересите на ИКТ индустријата: воспоставување на редовен процес за следење на состојбите и растот на ИКТ индустријата; соодветно лобирање на интересите на ИКТ индустријата пред надлежните институции со пренесување на проблемите и понуда на предлог решенија; зајакнување на комората со воведување на нови и проширени услуги кон членството; зајакнување на координацијата помеѓу приватниот сектор, јавниот сектор и образованието (формално и неформално) со цел адресирање на предизвиците поврзани со работната сила; промовирање на ИКТ индустријата и компаниите членки.

На 14ти март 2022 (понеделник) се одржа конференција насловена „Од марш за работнички права до дигитална економија“. Конференцијата беше организирана под покровителство на сопругата на Претседателот на Република Северна Македонија, г-ѓа Елизабета Ѓоргиевска, во рамки на проектот Мерки за зајакнување на женски бизниси по Ковид-19 кој е спроведен од Центарот за управување со промени (ЦУП), а поддржан од Balkan Trust for Democracy и USAID North Macedonia. Г-ѓа Елизабета Ѓоргиевска се обрати на самиот почеток на конференцијата и истакна дека чест е да се биде покровител на конференција со една навистина предизвикувачка тема, особено во овој чувствителен период на пандемија како и воен конфликт. Таа истакна дека „Рамноправното учество на жените на пазарот на трудот, го поттикнуваат економскиот раст и создава вредност за целото општество. Државите со поголема родова избалансираност, многу побрзо и полесно ги пребродуваат економските кризи“ – потенцираше г-ѓа Ѓоргиевска. Претседателката на Управниот одбор на МАСИТ, г-ѓа Анета Антова Пешева, со свој говор се обрати пред публиката во првата панел дискусија. Г-ѓа Пешева упати порака до сите млади девојки и жени, дека само со преку финансиска независност на жените, може да се постигне родова рамноправност во општеството. Во деловниот свет, во ИКТ секторот има голем потенцијал за сите, независно од родот. Таа ги истакна и бројот на жени дипломирани на ИКТ факултетите во земјата, каде евидентно е дека полека но сигурно се зголемува бројот на жени кои сааат да студитаат на овие смерови и се повеќе се доближуваме до некоја приближна бројка на дипломирани жени и мажи на овие факултети. Исто така, Пешева направи одлична дистинкција помеѓу професионално бавење со ИКТ професија и поседување на дигитални вештини, кои што сите ние се стремиме да ги развиваме. Во рамките на оваа конференција имавме можност да ги слушнеме и уште неколку претприемачки кои раководат со компании кои се членки на МАСИТ, со свои инспиративни обраќања до публиката . На втората панел дискусија ги слушнавме Валентина Тасева од Семос Едукација, Викторија Дранговска од КодеИТ Солушнс, Весна Ивановска од Сивус Едукативен и Развоен Центар, како и други претприемачки кои отворено ги споделија своите видувања и тоа почнувајќи од тоа зошто жените претприемачки може да бидат успешни бизнисменки и со кои се’ предизвици се соочиле во градењето на успешни женски бизниси. Дополнително слушнавме како жените од останатите сектори може да ги оптимизираат сите процеси во своите компании преку користење на дигитални алатки. Чест ни е што во МАСИТ членуваат компании кои на чело имаат успешни дами со инспиративни приказни и уште еднаш се уверивме дека има многу што да се научи од жена – претприемач.

Ве информираме дека на 18.03.2022 (петок), со почеток во 13:00 часот во хотел Александар Палас ќе биде одржано шеснаесеттото Годишно Собрание на Стопанската комора за информатички и комуникациски технологии МАСИТ Скопје. Собранието на Комората е највисок орган и него го сочинуваат сите членови. Членовите на Комората МАСИТ за заедничките работи одлучуваат на Собрание на Комората МАСИТ кое седница одржува еднаш годишно. Годишното Собрание ќе се одржи со доследно почитување и запазување на мерките за превенција од Ковид 19. Следете нѐ за повеќе информации.

МАСИТ во соработка со Про Кредит Банка, на 7ми март 2022 (понеделник) одржа виртуелна презентација на тема: „Управувајте самостојно со вашите финансии“ . На настанот учествуваа вработени во ИКТ секторот, а презентацијата ја водеа експертите од Про Кредит Банка, кои со присутните споделија исклучително корисни совети во поглед на тоа како најдобро да се донесат одлуки во врска со слободните средства, корисни информации во врска со инфлацијата во однос на штедењето во денари, евра или друга странска валута. Исто така, на презентацијата, присутните имаа можност да слушнат повеќе околу кредитите како банкарски производи и носењето одлуки за кредитирање и инвестирање, штедење, временски периоди и tips & tricks кои неретко банките воопшто не сакаат да ги знаеме. Погледнете ја целата презентација на нашата ФБ страница на линкот подолу. Видео од презентацијата

Онлајн презентација, 7ми март 2022 (понеделник) од 15:00 часот Во соработка со Прокредит Банка – патрон партнер на МАСИТ, организираме едукативна информативнапрезентација на тема: „Управувајте самостојно со вашите финансии“. Настанот е наменет за сите вработени во ИКТ компании кои сакаат да дознаат повеќе за тоа како да носат најдобри одлуки за инвестиции, преку советите од експертите за банкарски услуги од Прокредит Банка. Презентацијата ќе се одржи онлајн, во понеделник, 7ми март, 15:00 – 16:00 часот. Слободно препратете ја оваа покана до оние лица за кои сметате дека истата ќе им биде од корист. Сите заинтересирани ги замолуваме да ја пополнат следната форма за регистрација. Учеството на презентацијата е бесплатно.Линкот за вклучување ќе биде пратен до сите регистрирани учесници, еден ден пред презентацијата.

ИТ ЛАБС ДОО денес се вброи на листата донатори во рамки на мисијата за пристап до соодветно образование на секое дете која веќе 2 години ја спроведуваат МАСИТ, Првата детска амбасада во светот МЕЃАШИ, Центарот за управување со знаење и Асоцијацијата на советници за развој на кариера, АСК Скопје. ИТ ЛАБС ДОО, како општествено одговорна компанија која често ги поддржува ваквите иницијативи, се одѕва на повикот за поддршка на МАСИТ и донираше 7 користени компјутери за ученици од ранливите категории во две основни училишта од Скопје и тоа ООУ„Петар Поп Арсов„ и ООУ „Братство“. За потсетување, во рамки на оваа иницијатива, досега се донирани 60 компјутери на ученици од неколку основни и средни училишта. Со желба и надеж дека поддршката и соработката помеѓу ИТ заедницата, невладиниот сектор и училиштата ќе се интензивира и бројот на деца кои ќе имаат непречен пристап до образование ќе се зголемува, мисијата продолжува…

24.02.2022 (четврток), од 10:00 до 14:30 часот, онлајн Ве покануваме на претстојната ОБУКА на тема Закон за заштита на лични податоци за ИКТ компании, која ќе се одржи на 24.02.2022 (четврток), од 10:00 до 14:30 часот, онлајн преку ZOOM платформата. Обуката е наменета за ИКТ компании со цел поблиско претставување на генералните обврски и одговорности кои што за компаниите произлегуваат од Законот за заштита на личните податоци (Службен весник на РСМ, бр. 42 од 16.2.2020 година) кој што стапи на сила на 224.02.2020 година, но сите рокови за усогласување (формални и неформални) истекуваат на 24 февруари 2022 година. Овој закон е применлив за сите компании кои што вршат целосно или делумно автоматизирана обработка на личните податоци, или друга обработка на лични податоци кои се или треба да бидат дел од збирка на лични податоци. Предавач на обуката е Емилија Ангеловска, долгогодишен консултант за заштита на лични податоци и приватност во Инфиго ИС со огромно искуство во ревизија и имплементација на системи за заштита на лични податоци во компании од различни индустрии и од различни големини. Покрај тоа, Емилија редовно држи обуки и тренинзи, а воедно е и коавтор на Прирачник за имлементација на Законот за заштита на личните податоци. Емилија е сертифицирана со едни од најголемите светски стандарди во оваа област како што се CIPP/E, CDPO и ISO27001. Цена за учество: 2500 МКД + 18% ДДВ за членки на МАСИТ 5000 МКД + 18% ДДВ за компании кои не се членки на МАСИТ Доколку сте заинтересирани за присуство кликнете на линкот за регистрација и пополнете го формуларот. РЕГИСТРАЦИЈА

Скопје, 07.02.2022 – Стопанската комора за информатички и комуникациски технологии МАСИТ и Асоцијацијата за е-трговија на Македонија – АЕТМ, како организации кои имаат за цел да ги промовираат и застапуваат интересите на компаниите кои работат во доменот на ИКТ и е-трговија заеднички со иницијатива за предлог измена во Законот за данок на додена вредност. Целта на иницијативата е прецизирање на повластената стапка од 5% за софтверски решенија, вклучително и на решенија за е-трговија, која е потребна со цел елиминирање на можностите за различни и субјективни толкувања. Од АЕТМ и МАСИТ велат дека Законот за данокот на додадена вредност од самото воведување ги опфаќа дејностите од доменот на ИКТ индустријата на многу базично ниво, користејки терминологија дефинирана во 2007 година кога се овозможува примена на повластена даночна стапка од 5% за овој вид на услуги со цел стимулирање на развојот на информатичкото општество. “Несомнено е дека брзите промени кои се случуваат како резултат на развојот на технологиите претставуваат предизвик за регулативата насекаде во светот, која едноставно не може да ги прати промените. Потребни се нови начини на дизајнирање на регулатива која ќе обезбеди безбедност и доверба, а истовремено ќе обезбеди поволна околина за раст и развој. Сепак овој случај кој е предмет на нашата иницијатива не е предизвик од таков тип, едноставно се работи за терминoлогија со недоречености која е неопходно да се обнови. Нема идеална регулатива и постојано ќе треба промени, затоа клучна е брзината и отворeноста за постојани промени. Само така ќе успеeме постојано да ја подобруваме бизнис климата.” – вели Претседателката на АЕТМ, д-р Нина Ангеловска Во последната декада развојот на ИКТ секторот значително придонесе за појава на нови производи и услуги и на светско и на локално ниво, па оттука услугите како што се развој на софтвер по нарачка, софтверски услуги, одржување на софтвер, развој на веб сајт, развој на решенија за е-трговија (е-продавници), одржување на веб сајт, сервер администрација и други, не можат да се идентификуваат единствено со моменталната формулација која гласи “Софтвер за машини за автоматска обработка на податоци и нивни единици (компјутери)” (во Член 30 став 2 точка 2 од Законот за ДДВ). АЕТМ и МАСИТ предлагаат прецизно дефинирање и измена на ставот во “Развој на софтверски решенија (вклучително веб апликации, веб страни, решенија за е-трговија и мобилни апликации) софтверски лиценци и одржување на софтверски решенија”. Користењето на терминологија која не обезбедува прецизност при алоцирањето на одделниот промет на добра и услуги, создава простор за различни толкувања за користење на правото на примена на повластена стапка од 5% од страна на засегнатите страни во деловниот свет. – “ИКТ индустријата во последните години бележи постојан раст не само во остварените приходи туку и во бројот на компании, бројот на вработени, извозот и вработува млади и перспективни кадри со плати повеќе од двојно повисоки од просекот на ниво на држава. Владата треба да обезбеди поволна клима за понатамошен раст и развој на ИКТ идустријата која игра клучна улога во дигиталната економија, а најмалку што може е да го слушне гласот на заедницата кога се соочува со проблеми и да одговори со промени во насока на јасни правила за сите.” – објаснува Претседателката на Управен одбор на МАСИТ, Анета Антова Пешева. Прецизното дефинирање на ставките во законот ќе придонесе за јасна дистинкција на ставките што подлежат на повластена стапка од 5%, а со тоа ќе се намали и просторот за субјективни разбирања на предметната проблематика и ќе се намали просторот за различни толкувања од страна на засегнатите страни. Контакт лица:АЕТМ, Марија Ристовска, marija@ecommerce.mk , 078 679 892МАСИТ, Билјана Прличкова, biljana.prlichkova@masit.org.mk, 075280506